Vetrarhörkur í höfninni

Óvenjumikið vetrarríki hefur verið hér sunnanlands allt frá því í byrjun desember og frosthörkur meiri en um langt árabil.  Frostið hefur farið allt niður undir 15 gráður hér við Hafnarfjarðarhöfn og upp undir 20 gráður í mínus í Straumsvík.

Ekki er óvenjulegt að það leggi í smábátahöfninni yfir háveturinn, þar sem ferskt vatn úr Mössulæk rennur syðst inn í höfnina.  Hitt er óvenjulegra að Fjörðinn leggi meira og minna allt út undir hafnargarða.  Þykkur ís er við hafnarkanta allt út undir flotkví og mældist ísinn við Suðurbakka nú í morgun 15. janúar, um 15 cm. þykkur og um 10 cm. þykkur utar í höfninni.

Dráttarbáturinn Hamar þurfti að brjóta sér leið í gegnum ísbreiðuna í innri höfninni og ekki tók langan tíma að frjósa saman að nýju.  Þykkur snjóskafl var framan við Suðurbakka þar sem heimilað var að losa tímabundið snjó úr íbúahverfum bæjarins.