Skipakomur aldrei fleiri en 2024
Alls komu 612 skip og stærri bátar til hafnar í Hafnarfirði og Straumsvík á árinu 2024. Það er að öllum líkindum mesta umferð stærri skipa um Hafnarfjarðarhöfn frá upphafi en að jafnaði hafa stærri skipakomur verið um 450 – 500 á ári síðustu áratugina.
Mest var fjölgunin í komum grindvískra togara og stærri fiskibáta sem rekja má til eldsbrotanna á Reykjanesi sem hófust í árlok 2023. Einnig var nokkur fjölgun í komum erlendra togara og farmskipa, en fækkun í komum farþegaskipa.
Heildarafli sem kom á land í Hafnarfirði 2024 var um 50 þús. tonn eða um 12 þúsund tonnum meira en árið á undan. Stór hluti aukningarinnar var frá togurum og bátum frá Grindavík, en Hafnarfjörður var 3.ja stærsta löndunarhöfn landsins á bolfiski á árinu 2024.
Vöruflutningar jukust einnig frá fyrra ári, en um 1 milljón og 30 þúsund tonn fóru í gegnum Hafnarfjörð og Straumsvík. Nokkur aukning var vöruflutningum bæði í Straumsvík og Hafnarfjarðarhöfn. Samdráttur var í innflutningi á malarefni og olíu, en umtalsverð aukning í saltinnflutningi og útflutningi á brotajárni.